لە میانی مەراسیمێکی فەرمیدا لە بارەگای هێزە چەکدارەکانی لوبنان (LAF) لە یەرزە لە بەیروت، لوبنان، لە مانگی تەمموزی 2025، بۆ پشتیوانیکردنی هێزە چەکدارەکانی لوبنان (LAF) لە پێشەنگایەتیکردنی هەوڵەکانی بوژانەوە لە باشووری لوبنان، یەکێتی ئەوروپا پڕۆژەیەکی نوێی بە بڕی 12.5 ملیۆن یۆرۆ ڕاگەیاند.
ئەم پڕۆژەیە کە بڕیارە لەلایەن بەرنامەی نەتەوە یەکگرتووەکان بۆ گەشەپێدان (UNDP) جێبەجێ بکرێت، بەرزکردنەوەی ئاسایش و یارمەتیدانی کۆمەڵگاکانی بۆ ئاوەدانکردنەوە کردووەتە ئامانج.
”ئەم پڕۆژەیە نوێنەرایەتی هەنگاوێکی گرنگ دەکات بۆ دامەزراوە سەربازییەکە کە لەسەر ئاستی نیشتمانی بەرپرسیارێتییەکی گەورە لەئەستۆ دەگرێت،“ فەرماندەی سوپای لوبنان فەریقی یەکەم ڕۆدۆلف هەیکال ڕایگەیاند. ”سوپا لە هەوڵە بەرچاویەکانی بۆ بەرزڕاگرتنی دەسەڵاتی دەوڵەت لە سەرانسەری خاکی لوبنان، جێبەجێکردنی بڕیارنامە نێودەوڵەتییەکان بەردەوامە، بە تایبەتی بڕیارنامەی 1701، و پاراستنی ئاسایشی وڵات و چاودێریکردنی سنوورەکانی بەردەوام دەبێت.“
لە بڕیارنامەی 1701ـی ئەنجومەنی ئاسایشی نەتەوە یەکگرتووەکاندا هاتووە کە ناوچەیەکی بەتاڵ لە چەک لە نێوان سنووری باشووری لوبنان و ڕووباری لیتانی لە باشووری لوبنان، بەدەر لە هێزە چەکدارەکانی لوبنان (LAF) و هێزی کاتی نەتەوە یەکگرتووەکان لە لوبنان، دابمەزرێنرێت. لە ڕێککەوتنی ئاگربەستەکەدا هاتووە، هێزە چەکدارەکانی لوبنان (LAF) هێز بڵاودەکاتەوە، بە هەمان شێوە بەربەست و خاڵی پشکنین لەسەر هەموو ئەو ڕێگا و پردانەی بەدرێژایی ئەو هێڵەی کە ناوچەی باشووری لیتانی دیاری دەکات، دادەمەزرێنێت.
باڵیۆزی یەکێتیی ئەورووپا لە لوبنان ساندرا دی وال ڕایگەیاند کە پڕۆژەکە ڕەنگدانەوەی پابەندبوونی نەگۆڕی یەکێتیی ئەورووپایە بەرامبەر لوبنان و بەرەوپێشبردنی ئاشتی و سەقامگیری لە سەرتاسەری وڵاتەکە.
”بەیەکەوە لەگەڵ وڵاتانی ئەندامی یەکێتی ئەوروپا زیاتر لە 600 ملیۆن دۆلار وەک پشتیوانییەک پێشکەش بە ناوچە زیانلێکەوتووەکانی ململانێ لە لوبنان دەکەین، ئەمەش جەخت لەسەر ئەم پابەندبوونە دەکاتەوە،“ ناوبراو ئاماژەی پێدا. ”ئەم هەوڵانە تەواوکەری کارە دیپلۆماسییەکانمانن بۆ هەنگاونان بە ئاڕاستەی جێبەجێکردنی تەواوی بڕیارنامەی 1701ـی ئەنجومەنی ئاسایشی نەتەوە یەکگرتووەکان و پابەندبوونی هەموو لایەنەکان بە ڕێککەوتنی ئاگربەستی مانگی تشرینی دووەمی 2024.“
پڕۆژە پارەدارکراوەکە لەلایەن یەکێتی ئەوروپاوە، بەشێکە لەو یاداشتنامەی لێکتێگەیشتنە سێ قۆڵییەی لە مانگی ئایاری 2025 لەلایەن وەزارەتی بەرگریی لوبنان، بەرنامەی نەتەوە یەکگرتووەکان بۆ گەشەپێدان (UNDP) و فەرمانگەی ڕێکخەری تایبەتی نەتەوە یەکگرتووەکان بۆ لوبنان ڕێککەوتنی لەسەر کراوە.
ئامانج لە یاداشتنامەی لێکتێگەیشتنەکە هەماهەنگیکردنی هاوکارییە نێودەوڵەتییەکانە کە بە یارمەتی چەند وڵاتێکی هاوبەش و بەخشەر، لەوانە یەکێتی ئەوروپا، دانیمارک، فەڕەنسا، ئەڵمانیا، نەرویج، هۆڵەندا و ئیسپانیا، پێشکەش بە هێزە چەکدارەکانی لوبنان (LAF) دەکرێت.
لەگەڵ بەرگریکردن لە سەربەخۆیی وڵات و پاراستنی هاوبەشیی سەربازی بەهێز لەگەڵ هاوتاکانیان لە وڵاتانی هاوبەش، هێزە چەکدارەکانی لوبنان (LAF) لەگەڵ ڕێکخراوە ئاسایشیی و مرۆییە نێودەوڵەتییەکان بۆ باشتر خزمەتکردنی وڵاتەکەیان کاردەکەن.
سەرچاوەکان: بەرنامەی گەشەپێدانی نەتەوە یەکگرتووەکان، سوپای لوبنان