کۆماری قڕغستان لە مەشقی ئاک شومکاری 2025 میوانداریی هێزەکانی سەر بە ناوەندی هێزە ئاسمانییەکانی ئەمریکا و سوپای مۆنتانا و پاسەوانی نیشتمانیی ئاسمانی مۆنتانای کرد. وەزارەتی بەرگریی قڕغستان بۆ فراوانکردنی هاوبەشیی نێوان هەردوو وڵات و بەرزکردنەوەی هاوکاری و هەماهەنگی، لە 23 بۆ 27ـی مانگی حوزەیران لە بیشکێک مانۆڕی هاوبەشی ئەنجامدا.
مانۆڕە سەرپەرشتیکراوەکە لەلایەن قڕغستانییەکان لە ڕاهێنانی مەدەنی بۆ سەربازی لە بوارەکانی وەک هاوکاریی مرۆیی و وەڵامدانەوەوەی کارەساتەکان، چۆڵکردنی پزیشکیی ئاسمانی، گەڕان و ڕزگارکردن و ئاسایشی سنوورەکان پێکهاتبوو. فەریقی هێزی ئاسمانیی ئەمریکا دێریک فرانس، فەرماندەی هێزی ئاسمانی نۆیەم، ئاماژەی بەوەدا کە مەشقەکە ”لە بەهێزکردنی هەماهەنگییە ئاسایشییەکان لەگەڵ هاوبەشە قڕغستانیەکانمان، هەنگاوێکی بەرچاوە بەرەو پێشەوە،“ وە ئەزموونە هاوبەشەکە لە بنیاتنانی بناغەیەک بۆ هەماهەنگییەکانی داهاتوو یارمەتیدەر دەبێت.
هەرچەندە چالاکییەکانی ساڵی 2025 یەکەم گەڕی ئاک شومکار بوون، بەڵام سوپای قڕغستان و ئەمریکا لە ڕابردوودا لە چوارچێوەیەکی کاری فرەنەتەوەیی لەگەڵ هێزە سەربازییەکانی دیکەی ئاسیای ناوەڕاست و باشووری ئاسیا، وەک بەشێک لە زنجیرە مەشقەکانی هەماهەنگیی ناوچەیی فەرماندەیی ناوەندی ئەمریکا، پێکەوە مەشقیان ئەنجامداوە.
بە هەمان شێوە کۆماری قڕغستان و پاسەوانی نیشتمانیی مۆنتانا لە ساڵی 1996ـەوە وەک بەشێک لە بەرنامەی هاوبەشی ویلایەتیی پاسەوانی نیشتمانیی ئەمریکا، بە شێوەیەکی بەردەوام مەشق و ئاڵوگۆڕی پسپۆڕیی بابەتەکانیان ئەنجامداوە.
باڵیۆزی ئەمریکا لە کۆماری قڕغستان لێسڵی ڤێگری سەبارەت بە بەشداریی قڕغستان لە هاوبەشییە بەردەوامەکەدا ئاماژەی بەوەدا: ”قڕغستان لە ماوەی سێ دەیەی ڕابردوودا لە ڕێگەی هەماهەنگیی ئاسایشییەوە. وەبەرهێنانی لە بەهێزکردنی هاوبەشیی دوولایەنەماندا کردووە. ئاک شۆمکار دەرفەتی نایابی بۆ هێزە هاوبەشەکانمان ڕەخساندووە بۆ ئەوەی ئەزموونەکانیان لەپێناو بەرزکردنەوەی سەقامگیریی ناوچەکە لەڕێگەی هەماهەنگییەوە ئاڵوگۆڕبکەن.“
سەرچاوەکان: Kactus.Media، فەرماندەیی هێزە ئاسمانییەکانی ئەمریکا