تاجیکستان برای مقابله با قاچاق مواد مخدر غیرمجاز از ایالات‌متحده درخواست کمک نمود
به دلیل گستردگی جریان قاچاق مواد مخدر غیرمجاز از سرحدات، اداره مبارزه با مواد مخدر تاجیکستان از اداره کنترول مواد مخدر ایالات‌متحده کمک خواسته است.
اداره مبارزه با مواد مخدر تاجیکستان در مارچ 2022 اعلان کرد: «به دلیل تغییر شرایط سیاسی در افغانستان، پیدایش دوباره گروپ های جنایت‌کار سازمان‌یافته در منطقه، و افزایش میزان قاچاق در خاک تاجیکستان، مقامات تاجیکستان و ایالات‌متحده بر آمادگی خود برای تقویت همکاری دوجانبه با هدف مقابله با قاچاق تاکید کردند».
به راپور اداره مبارزه با مواد مخدر تاجیکستان، نهادهای دولتی تاجیکستان در سال 2021 بیش از چهار تن مواد مخدر غیرمجاز کشف کرده‌اند که این رقم در مقایسه با سال 2020 افزایش 68.4 فیصدی را نشان می‌دهد. قابل يادآوری است که مقدار هرویین و چرس کشف‌شده در سال 2021 به بیش از دو برابر مقدار مربوط به سال 2020 رسیده است.
ایالات‌متحده مساعی خود را برای کمک‌رسانی به تاجیکستان در راستای حفظ امنیت سرحدات در مقابل قاچاق سلاح و مواد مخدر غیرمجاز، و نیز جابجایی غیرقانونی مهاجرین، افزایش داده است. در 5 مارچ 2022، سفارت ایالات‌متحده در دوشنبه، با همکاری سازمان بین‌المللی مهاجرت، طرح سه-ساله‌ای را برای رفع این مشکلات مرزی آغاز کرد.
سفارت ایالات‌متحده قرار است 900,000 دالر به این طرح، که بشمول تعلیم قوای سرحدی تاجیک و بهبود تهداب‌ها در امتداد سرحد تاجیکستان-افغانستان است، اختصاص دهد.
سفارت در ماه مارچ 2022 اعلان کرد: «از سال 2002، دولت ایالات متحده طرحهای مختلفی را برای تقویت امنیت سرحدی از طریق نوسازی یا بازسازی قرارگاه های مرزی، امکانات گذرگاه‌های مرزی و سه مرکز تعلیمی اجرا کرده است. ضمناً، طرحهای کمکی دیگری مانند تقویت تجهیزات و امکانات تعلیمی برای حفظ امنیت و ثبات تاجیکستان اجرا شده است.»
در مارچ 2022، حبیب‌ا… وحیدزاده، رئیس اداره مبارزه با مواد مخدر تاجیکستان، از جامعه بین‌المللی درخواست نمود که به این کشور برای مقابله با گسترش تهدیدات از جانب افغانستان، بشمول قاچاق مواد مخدر، سلاح و انسان، فعالیت‌های تروریستی و افراط‌گرایی، و دیگر جرایم فرا-ملی، کمک کنند.
نظرات بسته شده است.