مانویل میکالر، سفیر جدید ایالات متحده در تاجیکستان، در اپریل 2023 وارد دوشنبه شد و بر همکاری امنیتی منطقوی بین دو کشور تاکید کرد.
میکالر اعتبارنامه خود را در 10 مارچ 2023 تسلیم امامعلی رحمان، رئیس‌جمهوری تاجیکستان، کرد و یک ماه بعد در نشستی خبری به تشریح همکاری‌های تاجیکستان و ایالات متحده پرداخت.
او اظهار کرد: «در حوزه امنیت، اولویت دو کشور مقابله با افراط‌گرایی و تروریزم، و نیز تقویت مرز تاجیکستان-افغانستان، است.»
یکی از اولویت‌های تاجیکستان مبارزه با قاچاق مواد مخدر و سلاح از افغانستان است. بطورمثال، در اپریل 2023، رویارویی قاچاقبران مواد مخدر، سلاح و مهمات با قوای تاجیکستان به درگیری مسلحانه منجر شد. این درگیری با عقب‌نشینی قاچاقبران به ناحیه بدخشان در شمال‌شرقی افغانستان پایان یافت.
مقامات تاجیکستان اقدام به ایجاد یک «کمربند امنیتی» منطقوی در اطراف افغانستان برای مقابله با گروپ‌های تبهکار، تروریست و افراط‌گرا که وارد خاک تاجیکستان و دیگر کشورهای آسیای میانه می‌شوند، کرده است. مرز تاجیکستان-افغانستان بیش از 1,300 کیلومتر طول دارد و مناطق کوهستانی و صعب‌العبور را پوشش می‌دهد.
میکالر، با تاکید بر اهمیت محافظت از سرحدات تاجیکستان، اظهار کرد که ایالات متحده تا فعلاً بیش از 25 ملیون دالر صرف ساخت و نوسازی 27 پسته سرحدی در خاک تاجیکستان کرده است. این فعالیت شامل 13 پایگاه مرزی، نُه پسته بازرسی مرزی، دو تعمیر تولی سرحدی و سه مرکز تعلیمی بوده است.
سفیر اظهار امیدواری نمود که همکاری تاجیکستان-ایالات متحده به نفع مردم تاجیکستان باشد.
منابع: Avesta، سفارت ایالات متحده در تاجیکستان، Ozodi
نظرات بسته شده است.