ډګرمن حمید بن ابراهیم البورومي د عمان د د ډله ییزې وژنې د وسلو د مخنیوي څانګې ته روزنه ورکوي
د یونیپث کارکوونکو لخوا کیسه او انځورونه
د غیرمتعارف جنګونو په دور کې غوره قطعات د ډلهییزې وژنې د وسلو د وژونکي ګواښ پر وړاندې د خپلو هیوادونو په خوندي ساتلو کې بوخت دي. پداسې شرایطو کې هیوادونه د ټولو احتمالي پیښو لپاره مخنیوونکو وړتیاوو ته پراختیا ورکوي. پدې وروستیو کې د یو تمرین په بهیر کې چې د متحده ایالاتو د مرکزي قوماندې له متخصصینو سره یوځای ترسره شو، یونیپث مجلې له ډګرمن حامد بن ابراهیم البرومي سره وکتل چې د ډلهییزې وژنې د وسلو د مخنیوی لپاره د عمان لومړی اداري افسر دی.
یونیپث: د عمان وسلوالو ځواکونو او د دوی امریکایی ملګرو ترمینځ د دې ګډ تمرین په اړه ستاسو نظر څه دی؟
ډګرمن البورومي: دا تمرین چې د ډلهییزې وژنې د وسلو د مخنیوی په برخه کې د متحده ایالاتو په همکارۍ ترسره شوی، د سلطان وسلوال ځواکونو او د کورنیو چارو وزارت د ملکي دفاع او امبولانس عامه ادارې لپاره خورا مهم دی. دا تمرین په کال 2016 کې پیل شو. دا هغه ګواښونه او پیښې تمثیلوي چې وار دمخه او په عملي توګه د نړۍ په بیلابیلو سیمو کې پیښې شوي، او د کیمیاوي، بیولوژیکي او رادیولوژیکي وسلو لخوا رامینځته شوي دي. دا کومه پټه خبره نده چې مینځنی ختیځ او عرب خلیج د کړکیچونو سره مخ دي، نو دا اړینه ده چې موږ د خپلو وړتیاو په لوړولو سره او د ډلهییزې وژنې د وسلو د مخنیوي په ډګر کې د متخصصو ځواکونو سره د مرستې له لارې د هرې سناریو پر وړاندې چمتووالی ولرو. او د ډلهییزې وژنې د وسلو د مخنیوي پرسونل سره مرسته وشي ترڅو تجربه ترلاسه او نوي تخنیکونه زده کړي چې په ترڅ کښې یې وکړای شي خپلې دندې ترسره کړي. په حقیقت کې امریکایان پدې برخه کې ماهرین لري، نو له موږ سره د دوی شتون یو ارزښتناک فرصت دی چې له دوی څخه زده کړه وکړو او هغه څه چې موږ پرې پوهیږو دوی سره شریک کړو.
له هغه راهیسې چې تمرین په کال 2016 کال کې پیل شو، لکه څنګه چې ما وویل، موږ د دوی فعالیتونه پراخ او نوي کوو ترڅو د دښمن ګواښونو او تاکتیکونو له زیاتوالي سره سمون ولري، ورپسې د ډلهییزې وژنې د وسلو د مخنیوي لپاره تجهیزات او تخنیکونو ته پراختیا ورکوو.
یونیپث: په وروستيو کلونو کې د تمرین د پراختیا په اړه موږ ته نور څه ووایاست؟
ډګرمن البورومي: په پیل کې د روزنې نصاب ساده و. دا د یو بل وړتیاوو د پیژندلو او شرایطو او تجربو د شریکولو په اړه و. تیرکال موږ له امرکایي ملګرو سره په همکارۍ هڅه وکړه چې په پلي شوو عملیاتي کړنلارو کې د ځوانو افسرانو مهارت او د بلوک او ټولي قوماندانانو د مشرتابه مهارتونو ته په ډګر کې پراختیا ورکړو ترڅو په اغیزمنه توګه هر ډول بېړني حالت ته چې د دوی د مسوولیت په سیمه کې پیښیږي ځواب ووایي. که څه هم تمرین په ورته سکټور کې د عملیاتو د همغږي کولو او څرنګوالي باندې تمرکز درلود، ځکه چې ځواکونه نور د ګواښونو سره د مبارزې لپاره یوازې کار نه کوي، خو موږ په یوه تشه ودانۍ کې د برید یوه صحنه پکې اضافه کړه. داسې شک کیږي چې یوه تروریستي ډله د کیمیاوي بمونو د جوړولو لپاره ورڅخه ګټه اخلي ترڅو په بریدونو کې یې وکاروي.
Comments are closed.